Serbska stawizna a serbska rěč je wosebitosć našeho wokrjesa. Tuta ma so dale spěchować.
Dobre hospodarske wobstejnosće su, runja wšitkim druhim wobydlerkam a wobydlerjam, tež za serbske wobydlerstwo wažny žiwjenski zakład. Chceš na serbskich wjeskach žiwy być, dyrbiš tež bliskosći dźěło měć. Tohodla chcu so za dobre žiwjenske wobstejnosće na kraju zasadźować. Naše wjesne kónčiny dyrbja dobry a atraktiwny žiwjenski rum wostać. To woznamjenja za mje, zo spěchujemy zdźerženje dróhow, zo dźiwamy na dobre zwiski w zjawnym wobchadźe a zo podpěramy serbsku šulsku syć. Bliske a krótke puće do zarjadnišćow chcemy wuwiwać. Tak budźemy zarjadniske posłužby nic jenož w městach Budyšin, Kamjencu a Wojerecach poskićić, ale tež na gmejnach, we wsach abo jeli trjeba, tež pola wobydlerstwa doma. Tak chcemy tež potrjebam staršeje ludnosće wotpowědować a wšitkim tym ,kotřiž njemóža zarjadnišća wopytać.
Spěchowanje čestnohamta je tež serbskim towarstwam a zwjazkam na dobro. Wone su žiwe rěčne rumy, kotrež přinošuja, serbsku rěč a identitu zdźeržeć.
Ale tež serbskich naležnosćow chcemy so přimać. Wokrjes Budyšin je “tón” serbski wokrjes. Za to chcu so dale zasadźować. Chcu, zo je dwurěčnosć w našim wokrjesu runohódna a samozrozumliwa. Měła dale a bóle prezentna być: w zjawnych twarjenjach, na taflach, při busach a busowych zastanišćach, na dróhach, w zjawnym wustupowanju wokrjesa a na zjawnych twarjenjach. Naš wokrjes ma wosebitosć, kotruž chcu do wšědneho wobraza wokrjesa na přirodne wašnje zawjazać. Tam mamy hišće wjele móžnosćow k polěpšowanju – hlej naša internetna strona.
We wokrjesnym zarjedźe mamy społnomócnjenu za serbske naležnosće. Wona je kontaktna wosoba za wšitkich w zarjedźe dźěłacych a za našu ludnosć. Jako krajny rada chcu dale wuski zwisk pěstować a tak dobre dźěłowe wobstejnosće zmóžnić. Tež mamy dźěłowy kruh za serbske naležnosće. Hižo dlěje diskutuje so ze serbskeje strony, zo měł so dźěłowy kruh kwalifikować a bliže na dźěławosć wokrjesneho sejmika wusměrić. Sym rady zwólniwy, zhromadnje lěpše dźěłowe wobstejnosće tworić.
Runje tak chcu hižo dobry wobstejacy kontakt k Domowinje a Załožbje za serbski lud dale pěstować. Wobaj staj wažnej serbskej akteraj. Třěšny zwjazk Domowina ze swojimi wšelkimi towarstwami je wažny ciwilno-towaršnostny akter a wokrjes při serbskich naležnosćach derje poradźuje. Załožba je wažny partner při spěchowanju serbskich institucijow. Zhromadnje staramy so mjez druhim wo zdźerženje Serbskeho muzeja, kotryž je w nošerstwje wokrjesa a wo dobre wuhotowanje tamnych serbskich institucijow z pomocu kulturneho ruma.
Jako dźěćo słyšach dźěda a wowku wšědnje serbować. Serbšćina je za mje rjana dopomnjenka z dźěćatstwa. Bohužel njeje so rěč w našej swójbje pěstowała. Dźensa wobžaruju, zo njeje so mi tute kubło do kolebki kładło. Mamy wjele ludźi, kotrež serbsku rěč hižo njerěča abo swoje serbske korjenja hižo njepěstuja, so tomu pak wuznawaja. We wokrjesu budźemy dale zmóžnić, zo naši přistajeni serbsku rěč wuknyć móža. Runje tak chcemy, zhromadnje z wokrjesom Zhorjelcom a z pomocu Domowiny, Serwisowy běrow za serbsku rěč w komunalnych naležnosćach dale wudźeržować. Je to wažny přinošk k widźomnej dwurěčnosći.
To serbske njeje samozrozumliwe. Je to za nas šansa jónkrótnosć a bohatosć našeho wokrjesa pěstować. Ja chcu tole jako krajny rada aktiwnje sobu do skutka stajić. Prošu tuž 12. junija wo Wašu podpěru a Waš hłós.
Udo Wićaz
